ఆంధ్రప్రదేశ్ ముఖ్యమంత్రి నారా చంద్రబాబు నాయుడు దేశ రాజధానిలో ప్రధానమంత్రి నరేంద్ర మోదీతో సమావేశమయ్యారు. విజయనగరం జిల్లాలోని భోగాపురంలో సిద్ధమైన అల్లూరి సీతారామరాజు అంతర్జాతీయ విమానాశ్రయం ప్రారంభోత్సవానికి ముఖ్య అతిథిగా విచ్చేయాలని ఈ సందర్భంగా ప్రధానిని ఆయన కోరారు. స్వాతంత్ర్య యోధుడు అల్లూరి పేరు మీదుగా నిర్మించిన ఈ ఎయిర్‌పోర్ట్ రాష్ట్రానికే గర్వకారణమని చంద్రబాబు వివరించారు. ఢిల్లీ పర్యటనలో ఉన్న సీఎం, ప్రధానితో భేటీ అయి భోగాపురం అంతర్జాతీయ విమానాశ్రయం విశిష్టతలను తెలియజేశారు.

ఇది ఆంధ్రప్రదేశ్‌లో ఒక కీలకమైన మౌలిక సదుపాయాల ప్రాజెక్టు అని, దీనికి విప్లవ వీరుడు అల్లూరి సీతారామరాజు నామకరణం చేశామని పేర్కొంటూ అధికారిక ఆహ్వాన పత్రాన్ని అందజేశారు. ఈ విమానాశ్రయం అందుబాటులోకి వస్తే ఉత్తరాంధ్ర ప్రాంతంలో ప్రయాణ సౌకర్యాలు మరియు అనుసంధానత గణనీయంగా మెరుగుపడతాయని ప్రభుత్వం ఆశిస్తోంది.

ఉత్తరాంధ్ర ప్రగతికి భోగాపురం ఎయిర్‌పోర్ట్ ఒక మైలురాయిగా నిలుస్తుందని చంద్రబాబు అభిప్రాయపడ్డారు. ఈ ప్రాజెక్టు ద్వారా ప్రాంతీయ, జాతీయ మరియు అంతర్జాతీయ విమాన రాకపోకలు మెరుగుపడతాయని ఆయన వివరించారు. మెరుగైన రవాణా వ్యవస్థల వల్ల పర్యాటక రంగం, వాణిజ్యం, పరిశ్రమలతో పాటు కొత్త ఉద్యోగ అవకాశాలు లభిస్తాయని ఆయన ఆశాభావం వ్యక్తం చేశారు. రాష్ట్రాకి పెట్టుబడులను రప్పించడంలో ఈ విమానాశ్రయం కీలక భూమిక పోషిస్తుందని ప్రభుత్వం భావిస్తోంది. అలాగే, నరేంద్ర మోదీ నాయకత్వంలో దేశీయ విమానయాన రంగం సాధించిన పురోగతిని చంద్రబాబు కొనియాడారు. సామాన్యులకు సైతం విమాన ప్రయాణాన్ని చేరువ చేయాలన్న కేంద్ర ప్రభుత్వ సంకల్పం సత్ఫలితాలను ఇస్తోందని, దేశవ్యాప్తంగా విమానాశ్రయాల నెట్‌వర్క్ పెరగడం వల్ల కోట్లాది మందికి లబ్ధి చేకూరుతోందని ఆయన అన్నారు.

భోగాపురం విమానాశ్రయం ప్రారంభమైన తర్వాత ఉత్తరాంధ్రలో పారిశ్రామిక పెట్టుబడులు వెల్లువెత్తుతాయని రాష్ట్ర ప్రభుత్వం అంచనా వేస్తోంది. ఐటీ, ఎగుమతులు మరియు పర్యాటక రంగాలు ఈ అంతర్జాతీయ కనెక్టివిటీ వల్ల అధికంగా ప్రయోజనం పొందుతాయని అధికారులు విశ్లేషిస్తున్నారు. విశాఖపట్నం పరిసర ప్రాంతాల ఆర్థికాభివృద్ధికి ఇది ఊతమిస్తుందని, వ్యాపార కార్యకలాపాలు పెరగడానికి అనుకూల వాతావరణం ఏర్పడుతుందని భావిస్తున్నారు. ప్రధాని మోదీ ఆశయమైన ‘వికసిత్ భారత్’ నిర్మాణంలో ఆంధ్రప్రదేశ్ చురుకైన భాగస్వామి అవుతుందని చంద్రబాబు స్పష్టం చేశారు. కేంద్రాన్ని సమన్వయం చేసుకుంటూ రాష్ట్రాన్ని ‘స్వర్ణాంధ్రప్రదేశ్’గా మార్చడమే తమ లక్ష్యమని, అందులో భాగంగానే మౌలిక వసతుల కల్పనకు పెద్దపీట వేస్తున్నామని చెప్పారు.

ప్రధాని మోదీకి ఆహ్వానం పంపడంతో భోగాపురం ఎయిర్‌పోర్ట్ ప్రాజెక్టుపై సర్వత్రా ఆసక్తి పెరిగింది. ఉత్తరాంధ్ర కనెక్టివిటీని పెంచడం ద్వారా ఆర్థిక వృద్ధిని సాధించాలన్నది ప్రభుత్వ ప్రధాన ఉద్దేశం. మోదీ-చంద్రబాబు భేటీలో ఈ విమానాశ్రయ ప్రారంభోత్సవ అంశం హైలైట్‌గా నిలిచింది. ఈ కొత్త విమానాశ్రయం రాకతో ఉత్తరాంధ్ర రూపురేఖలు ఎలా మారతాయో చూడాలని విశ్లేషకులు భావిస్తున్నారు.

Also Read : Cyclone Arnab: తుఫాన్‌పై రాత్రంతా సీఎం చంద్రబాబు సమీక్ష.. ప్రజలకు భరోసా